Now Playing Tracks

حلمت ببابا انهارده كنا في رحله مع العايله وكنا كلنا مع بعض مش فاكره التفاصيل اوي بس  في اخر الحلم احنا كنا في باص كبير وفجاه وقف الباص وانا وبابا نزلنا ودخلنا مكان كده  شبه المتحف وكان الناس اللي فيه لابسين ابيض وبابا مش فاكره راح فين وانا قعدت مع الناس دي وكنت اعرفهم تقريبا كانوا صحابي او زمايلي ف الشغل لان انا كنت بشتغل ف المكان ده تقريبا او حاجه كده يعني وانا كنت تعبانه من اول ما دخلت المكان بس مش قلت حاجه بس وانا قاعده مع البنتين دول واحده منهم حست ان انا تعبانه وحطت ايدها علي قلبي وكانت قلقانه وجابت حاجه كده وسحبت دم مني وبعدين مشيت وبعد كده بشويه جت البنت التانيه و وشها قالب وبيقول ان في مصيبه حصلت وكانت بتهمس بحاجه للي كانت جنبها وكانوا بيبصوا ليا انا عرفت ساعتها ان بابا مات مش عارفه ازاي بس انا عرفت كده وكنت قاعده برجع لورا وانا بهز راسي وبقول لا هو ماماتش انتوا كدابين والبنتين دول كانو بيقربوا عشان يحاولوا يهدوني والباب بتاع المدخل بتاع المكان اتفتح ودخلت العايله كلها معادا حد معين كنت ببص لاختي الكبيره بقولها بعيني تقولي ان هما بيكدبوا وان بابا عايش وهي بصتلي وعينيها مدمعه وزعلانه ورفعت صباعها لفوق للسما يعني هو دلوقتي عند ربنا وان ربنا كاتب ان هوا يموت وساعتها انا بعدت عنهم كلهم وجريت اطلع برا المكان ده و بعد ما طلعت وقفت ادور عليه (مش بابا الحد اللي انا قلت ان هو الوحيد اللي مدخلش )

بصيت لقيتو بيعملي باي بايده  وبيضحك وكان لسا مش عارف ان بابا مات 

وانا رايحه ليه الحلم وقف وانا صحيت مش عارفه ايه نهايه الحلم

صحيت موجوعه وحسيت ان كل المشاعر اللي حسيت بيها لما بابا مات رجعت تاني  وحسيت بيها

وكنت حاسه اني زعلانه اوي يعني مش كفايه ان عشت موت بابا ده مره ولسا عايشاه لحد دلوقتي لا كمان عشتو تاني في حلمي وكمان كنت مضايقه لان صحيت وانا ف طريقي ليه (الحد المعين)

يعني علي الاقل لو كنت روحت ليه كان مش هحس بالوجع ده

مش عارفه مشاعري ناحيته , ايه بالظبط بس اللي اعرفه ان انا مش عارفه حاجه وده مخليني حاسه اني ف ضلمه فظيعة ومن غير اي نور 

To Tumblr, Love Pixel Union